Sunday, May 10, 2015

सिबिल स्कोर कर्ज आणि क्रेडिट कार्ड मिळविण्या करीता महत्वाचा झाला आहे. तुम्हाला माहिती आहे का CIBIL Score म्हणजे नक्की काय ते



सिबिल स्कोअर ग्राहकांना ४५० रुपयांच्या मोबदल्यात उपलब्ध करून देण्यात येणार आहे. या स्कोअरच्या आधारावरच सगळ्या बॅंका किंवा वित्तसंस्था ग्राहकांना कर्ज देतात, हे तर सगळ्यांना माहिती आहे. तरीही हा स्कोअर जाणून घेण्यासाठी ४५० रुपये देणे योग्य आहे का, हे समजून घ्यावे लागेल.
क्रेडिट इन्फोर्मेशन ब्यूरो ऑफ इंडिया लिमिटेड ही ग्राहकांच्या क्रेडिटसंदर्भातील माहिती देणारी एक कंपनी आहे. बॅंका आणि अन्य वित्तसंस्थाकडून कर्ज घेणाऱया ग्राहकांची माहिती सिबिल आपल्याकडे जमा करते. ग्राहकांनी घेतलेले कर्ज आणि त्याची परतफेड या सगळ्याची माहिती सिबिल आपल्याकडे जमवते. तुम्ही गेल्या ३-४ वर्षांत कोणतेही कर्ज घेतलेले असले किंवा तुम्ही कोणतेही क्रेडिट कार्ड वापरत असाल, तर तुमच्या कर्जाबद्दलची सगळी माहिती सिबिलकडे असते. तुम्ही घेतलेल्या कर्जाची परतफेड वेळच्यावेळी आणि योग्य पद्धतीने केलेली असेल, तर सिबिलकडे त्याबाबतची सगळी माहिती असते. तुम्ही आणखी कर्जासाठी किंवा क्रेडिट कार्डसाठी अर्ज केला असेल, तर सिबिलकडे तुमचे रेकॉर्ड चांगले असल्यास तुम्हाला सहजपणे नव्याने कर्ज मिळू शकते.
सिबिलकडून आता कर्जाच्या परतफेडीच्या अहवालाबरोबरच तुमचे स्कोअरकार्डही मागू शकता. या स्कोअरकार्डमध्ये ३०० ते ९०० अंकांमध्ये तुमचा स्कोअर देण्यात आलेला असतो. या स्कोअरकार्डच्या साह्याने तुम्ही कर्जाची परतफेड करण्याची शक्यता कितपत आहे, याचा अंदाज बांधला जाऊ शकतो.
जर तुमचा स्कोअर ९०० असेल, तर तुम्ही कर्जाचे हप्ते चुकविण्याची शक्यता अजिबात नाही, हे कर्जदात्यांना ठरविता येऊ शकते. याच्या अगदी उलटे म्हणजे जर तुमचा स्कोअर ३०० असेल, तर तुम्ही कर्जाचे हप्ते चुकविण्याची शक्यता अधिक असल्याचे स्पष्ट होते. एका विशिष्ट पद्धतीने हा स्कोअर काढला जातो. त्यामुळे समान उत्पन्न असूनही तुमचा स्कोअर कमी आणि तुमच्या एखाद्या मित्राचा स्कोअर जास्त का, याची माहिती तुम्हाला मिळू शकत नाही. कोणत्या कारणांमुळे तुमचा सिबिल स्कोअर कमी झालाय, याची माहिती तुम्हाला मिळू शकते. उदा. तुम्ही जर क्रेडिट कार्डचे पैसे वेळच्यावेळी भरले नसतील, तर तुमचा स्कोअर कमी होऊ शकतो.
सिबिल स्कोअर आणि त्याचा अर्थ
६०० आणि त्यापेक्षा कमी स्कोअर चांगला मानण्यात येत नाही. या स्कोअरच्या आधारावर कोणीही तुम्हाला क्रेडिट कार्ड देणार नाही.
६०० ते ७०० स्कोअर असेल, तर तुमच्या आर्थिक व्यवहारांबद्दल अतिरिक्त माहिती मिळाल्यावरच तुम्हाला क्रेडिट कार्ड मिळू शकते.
७०० ते ७५० च्या दरम्यान स्कोअर असेल तर सहजपणे तु्म्हाला क्रेडिट कार्ड मिळू शकते.
७५१ ते ८०० स्कोअर चांगला मानण्यात येतो, यामध्ये अधिक सहजपणे तुम्हाला क्रेडिट कार्ड मिळते.
८०० आणि त्यापेक्षा अधिक स्कोअर अतिशय योग्य मानण्यात येतो. तुम्हाला सहजपणे क्रेडिट कार्ड किंवा कर्ज मिळू शकते.
(हर्ष रुंगठा - लेखक अपनापैसा डॉट कॉमचे चीफ एक्झिक्युटिव्ह ऑफिसर आहेत.)

Saturday, May 9, 2015

विमा पॉलिसीचा प्रिमियम कमी कसा करता येईल, याचे काही उपाय आम्ही इथे देत आहोत.



विमा पॉलिसीचा प्रिमियम कमी कसा करता येईल, याचे काही उपाय आम्ही इथे देत आहोत.
तरुण वयातच घ्यावी पॉलिसी
विम्याची पॉलिसी खरेदी करण्यास वेळ लागू देऊ नये. जस जसे तुमचे वय वाढेल. त्याप्रमाणे विम्याचा हप्तादेखील वाढत जातो. अनेक तरुण आर्थिक बोजामुळे विम्याला गंभीरपणे घेत नाहीत. जसे जसे वय वाढू लागते, तस तसे कळते की विमा खूप आवश्यक आहे. जर तुम्ही वयाच्या ३५ व्या वर्षांनंतर विमा पॉलिसी घेतली आणि तुम्हाला कोणता आजार असेल, तर तुमच्या प्रिमियमची रक्कम वाढू शकते. त्यामुळे तरुण वयात लवकरात लवकर पॉलिसी घेणे कधीही फायदेशीर ठरते.
ऑनलाईन खरेदी उपयुक्त
काही विमा कंपन्यांच्या ऑनलाईन पॉलिसी स्वस्त असतात. संपूर्णपणे माहिती घेऊन ऑनलाईन पॉलिसी खरेदी करणे कधीही फायदेशीर ठरते. तुम्ही एजंटकडून पॉलिसी घेतली तर त्याच्या प्रिमियममधील ठरावीक रक्कम एजंटला द्यावी लागते. त्यामुळे एजंटकडून पॉलिसी घेणे शक्य असल्यास टाळावे. ऑनलाईन पद्धतीने तुम्ही विमा पॉलिसी खरेदी केली तर कोणत्याही पेपरवर्कचा खर्च येत नाही आणि त्याचबरोबर एजंटला द्याव्या लागणाऱया रकमेतही बचत होते. त्यामुळेच अनेक विमा कंपन्यांनी आपल्या ऑनलाईन पॉलिसीच्या किंमती कमी ठेवल्या आहेत.
तंदुरुस्तीकडे द्यावे काटेकोरपणे लक्ष
शारीरिक तंदुरुस्तीकडे काटेकोरपणे लक्ष दिले पाहिजे. जसंजसे वय वाढू लागते, तसंतसे कोणताही मनुष्य कमजोर होऊ लागतो. त्यामुळे आजारी पडण्याची शक्यता वाढते. तुम्हाला जर कोणता आजार असेल, तर विमा कंपन्या तुमच्याकडून अतिरिक्त प्रिमियम वसुली करतात.
गरज असेल तरच घ्यावेत अन्य रायडर
तुम्ही जर स्वतंत्रपणे ऍक्सिडेंट किंवा क्रिटकल इलनेसचा विमा उतरविला असेल, तर जीवनविम्यामध्ये या संदर्भातील रायडर निवडू नका. या सुविधा कोणालाही फ्रीमध्ये मिळत नाहीत. त्याची वेगळी किंमत चुकवावी लागते. त्यामुळे गरज असेल तरच क्रिटिकल इलनेससंदर्भातील रायडरची निवड करावी.
वर्षाला भरावा प्रिमियम
विमा पॉलिसीचा प्रिमियम वर्षाला देण्याचा पर्याय निवडावा. जर तुम्ही मासिक, त्रैमासिक, अर्धवार्षिक प्रिमियम देण्याचा पर्याय निवडला, तर तुम्हाला जादा पैसे द्यावे लागतात. वर्षाला प्रिमियम भरण्याचा पर्याय निवडला तर विविध अधिभारातून तुमची सुटका होते. त्यामुळे आपोआपच तुमचा प्रिमियम कमी होतो.
पॉलिसीची मुदत
जर तुम्ही दहा वर्षांची पॉलिसी घेतली तर तुम्हाला जास्त प्रिमियम भरावा लागेल. पण जर तुम्ही २० वर्षांची पॉलिसी घेतली तर तुम्हाला कमी प्रिमियम भरावा लागेल. त्यामुळे पॉलिसीचा कालावधी शक्य तितका वाढविण्यावर जास्त भर द्यावा.

ईपीएफओतील ५ टक्के रकमेची होणार शेअर बाजारात गुंतवणूक


सरकारने कर्मचारी भविष्य निर्वाह निधीतील (ईपीएफओ) पीएफ कोशातील ५ टक्के निधीला एक्स्चेंज ट्रेडेड फंडात (ईटीएफ) गुंतवणूक करण्याची परवानगी दिली आहे. यामुळे अर्थातच चालू आर्थिक वर्षात बाजारात पाच हजार कोटी रुपये येणाची शक्यता असून, श्रम मंत्रालयाने यासंबंधीची ईपीएफओतील गुंतवणुकीसाठी एक नव्या पद्धतीची अधिसूचना जारी केली आहे. श्रम मंत्रालयाचे सचिव शंकर अग्रवाल यांनी ही माहिती नुकतीच प्रसारमाध्यमांना दिली आहे.
अग्रवाल यांनी पुढे अशीही माहिती दिली की, आम्ही ईटीएफमध्ये गुंतवणुकीची सुरुवात एक टक्क्यापासून करू आणि या अार्थिक वर्षाच्या अखेरीपर्यंत ती गुंतवणूक ५ टक्क्यांपर्यंत वाढविली जाईल. अर्थ मंत्रालयाने याबाबतीत असा सल्ला दिला आहे की, आम्ही आपल्या निधीतील ५ ते १५ टक्के निधीची गुंतवणूक शेअर बाजारात करावी. आम्हाला याची सुरुवात फक्त इटीएफ च्या माध्यमातून करावयाची आहे. यानंतर आम्ही ठरवू की, पीएसयू ईटीएफमध्ये कीती वाटा लावायचा आहे. जर हे श्रमिकांच्या हिताचे असेल तरच असा निर्णय घेतला जाईल. २०१४ -१५ मध्ये ईपीएफओ ला जवळजवळ ८० हजार कोटी रुपयांच्या ठेवी (डिपॉझीट) मिळाल्या आहेत. गेल्या वर्षी सप्टेंबरमध्ये ईपीएफओ च्या सामाजिक सुरक्षा योजनेअंतर्गत मासिक वेतन मर्यादेला ६,५०० वरुन वाढवून १५,००० रुपये केले गेले आहे. यामुळे अार्थिक वर्ष २०१५-१६ मध्ये एक लाख कोटींच्या ठेवी मिळण्याचे अंदाज आहेत.
Saurce- Divymarathi 

What is Investment ?